بيرمي A ديال الموطور

بغيتي دوز بيرمي A ديال الموطور ومعرفتيش شحال ديال الوقت وكيفاش غادي دوزو وشحال غادي تخلص 👍
هاد البوسط غادي نعطيك أسهل طريقة باش دوز بيرمي الموطور وتنجح فيه ✅
🔶 أولا : غادي تمشي تقيد فمدرسة تعليم السياقة لي قريبة ليك . وثمن باش غادي دوز بيرمي الموطور مابين 2000 درهم حتال 3000 درهم على حسب المدرسة 👍
بالنسبة للوثائق : غادي إطلبو منك صورة ديال البطاقة الوطنية وصورة ديال رخصة السياقة الى عندك بيرمي B ديال السيارة 👍
وغادي تمشي تكاليزي واحد الورقة وتجيبها للمدرسة .
ومول المدرسة غادي إحدد ليك تاريخ الإمتحان على حساب نتا شحال ديال الوقت بغيتي . أحسن وقت هو شهر كامل وغادي تقدر تقرا فيه وتنجح إن شاء الله 👍
🔶 ثانيا : غادي تاخد واحد الكود ديال التسجيل في منصة perminou الخاصة ب Narsa للتعليم عند بعد 👍 رابط المنصة
http://perminou.narsa.gov.ma/accounts/signin/?next=/quizexamenblanc/take/
هاد المنصة مهمة جدا . وهي لي تقدر تقرا فيها من دارك ومن تيلفونك فأي وقت وهي لي تقدر تلقا فيها جميع الدوروس والمعلومات الخاص بإمتحان تعليم السياقة 👍
عدد أسئلة الإمتحان الخاص بالدراجة A . هو 46 سؤال منها 38 سؤال خاص بأسئلة السيارة وقانون السير و 8 أسئلة خاصة بالدراجات النارية وكيفاش تعامل معها .
إلى بغيتي تنجح في إمتحان خاصك تجيب 38/46 ✅
إلى نجحتي كتمشي دوز إمتحان السياقة على الدراجة النارية . وكيكون ساهل إلى دوزتي حصص من قبل في المدرسة ✅
يعني دبا راه غير من تيلفونك ممكن تقرا الكود وتوجد للإمتحان . وفي ظرف شهر ممكن تجيبو وتهنى من البيرمي .
كتبقى غير الرغبة وتزعم أما شهر بالزربة كيفوت 👍
ملاحظة مهمة راه منصة perminou NARSA كتسجل فيها برقم البطاقة الوطنية ديالك . وكتدخل ليها بالكود ديالك . وخاصك تعرف أنه كيتحسب ليك شحال ديال الوقت قريتي فيها . وشحال ديال الوقت دوزتي فكل محور وكطلع ليهم بالسيستيم أنك قريتي في المنصة . وكيكونو عندك حظوظ باش تنجح من أول إمتحان ✅
يعني راه مهمة بززاف . ماشي تمشي لليوتوب بوحدو مكافيش 👍
الله إسهل على أي واحد فيكم . باغي إدوز البيرمي.
مكاين ما أحسن من القانون وهادشي علاش كنشجعو فيكم . والحمد لله بززاف دوزو البيرمي بفضل المنشورات ديالنا ✅ وكنتمنى تكون حتى نتا وحد منهم 😍
باش تكون حر وتركب مرتاح في الطريق وتسافر وتمتع بكل حرية بحال الحمام في السما 😍